07.07.2022

Чэлендж, выставы, літаратурныя чытанні. На Бераставіччыне адзначаюць 140-гадовы юбілей Янкі Купалы

7 ліпеня спаўняецца роўна 140 гадоў з дня нараджэння Янкі Купалы.

Яго імя неразрыўна звязана з Беларуссю: вялікая колькасць вершаў, яскравая публіцыстыка, пераклады. Беларускі пясняр пакінуў нам пасля сябе вялікую спадчыну.

Сапраўднае імя паэта Іван Дамянікавіч Луцэвіч. Нарадзіўся паэт ў вёсцы Вязынка (зараз гэта Маладзечанскі раён Мінскай вобласці) ў свята Купалле, таму і ўзяў сабе псеўданім Купала.

У юбілейную дату ў Купалаўскім мемарыяльным запаведніку «Вязынка» адбудзецца Рэспубліканскае свята паэзіі, песні і народных рамёстваў.

У Бераставіцкай раённай бібліятэцы імя В. М. Кавалеўскага і яе філіялах на вёсцы юбілей беларускага паэта не застанецца без увагі. Пройдуць бібліяграфічныя агляды і выставы творчасці Янкі Купалы, паэтычныя гадзіны і літаратурныя чытанні.

У райбібліятэцы адбудзецца адкрыты прагляд літаратуры “У храме слова Янкі Купалы”.

Таксама дарослыя і юныя чытачы Бераставіччыны актыўна далучаюцца да абласнога чэленджа “Класічна…патрыятычна”: Гродзеншчына чытае Янку Купалу і Якуба Коласа”.  Падчас яго правядзення неабходна зрабіць фотаздымкі за чытаннем твораў паэтаў-юбіляраў і даслаць для размяшчэння на сайтах раённай і абласной бібліятэк.

Святлана Ганчарова